ಸಾಂ. ಜೋಕಿಂ ಫಿರ್ಗಜ್, ಕಡಬ

“ ತುಂವೆ ಕೆಲ್ಯಾಂಯ್ ಸೊಮ್ಯಾ ವಿಚಿತ್ರಾಂ !

ಸಗ್ಳ್ಯಾ ಕಡಬ ಫಿರ್ಗಜೆಂತ್ ಆನಿ ಕಡಬ ಪರಿಸರಾಂತ್”

ಪಾತ್ರೊನ್ ಸಾಂತಾ ಜೋಕಿಮಾ ಮುಖಾಂತ್ರ್.

ಆಜ್ ಸಗ್ಳ್ಯಾ ಫಿರ್ಗಜ್ ಕುಟ್ಮಾ ಸಾಂಗಾತಾ ಮೆಳೊನ್ ದಿನ್ವಾಸ್ತಾ ಆನಿ ಉದ್ಗಾರ್ತಾ, 

ಹರ್ಸಿಲ್ಲೆಂ ಜಾಂವ್ ಸೊಮ್ಯಾಚೆಂ ನಾಂವ್, ಆತಾಂ ಆನಿ ಸದಾಂಕಾಳ್.”

  ಉದೆಂತಿಚೆ ರೋಮ್ ಮ್ಹಣ್ ನಾವಾಡ್ಲೆಲ್ಯಾ ಮಂಗ್ಳುರ್ ಶ್ಹೆರಾಚ್ಯಾ ಉದೆಂತಿಕ್ ಸುಮಾರ್ 82 ಕಿ.ಮೀ. ಪಯ್ಸ್ ಆಸ್ಚ್ಯಾ ಕಡಬಾಂತ್ 1924 ಇಸ್ವೆಂತ್ ಏಪ್ರಿಲ್ 1 ತಾರಿಕೆರ್ ತವೊಳ್ಚೊ ಗೊವ್ಳಿಬಾಪ್ ಅ.ಮಾ. ಕಾರ್ಲೊ ಪಿರಿನಿ ಹಾಣಿಂ ಸಾಂ. ಜೋಕಿಮಾಕ್ ಸಮರ್ಪಿಲ್ಲೆಂ ಮಿಸಾಂವ್ ಠಾಣೆ ಮ್ಹಣ್ ವೊಲಾಯ್ಲೆ ಆನಿ ಬಾಪ್ ಲೋರೆನ್ಸ್ ಲೋಬೊಕ್ ಕಡಬಾಚೊ ಪಯ್ಲೊ ವಿಗಾರ್ ಜಾವ್ನ್ ನೇಮಕ್ ಕೆಲೊ. ಲಾಗ್ಶಿಲ್ಯಾ ಪಂಜಚ್ಯಾ ಕ್ರೀಸ್ತಾಂವ್ ಕುಟ್ಮಾಂಕ್ ಹಾಂಗಾಸರ್‌ಚ್ ತಾಂಚ್ಯೊ ಆತ್ಮಿಕ್ ಗರ್ಜೊ ತರ‍್ಸುಂಕ್ ಅವ್ಕಾಸ್ ದಿಲೊ. 

ಬಾಪ್ ಲೋಬೊ ಕ್ರೀಸ್ತಾಂವಾoಕ್ ಆತ್ಮಿಕ್ ವ್ಹಡಿಲ್ ಜಾವ್ನ್ ಆನಿ ಸರ್ವ್ ಜಾತಿ ಕಾತಿಚ್ಯಾ ಲೊಕಾಕ್ ನ್ಯಾಯ್ ನೀತ್ ಕರ್ನ್ ದಿಂವ್ಚೊ ನಿತಿದಾರ್ ಜಾವ್ನ್ ಆಸ್ಲೊ. ತಿತ್ಲೆಂಚ್ ನ್ಹಂಯ್ ತ್ಯಾ ಕಾಳಾರ್ ಹಾಂಗಾಚ್ಯಾ ಲೊಕಾಕ್ ಮುಳಾವೆಂ ಶಿಕಪ್ ಮೆಳಾಜೆ ಮ್ಹಳ್ಳ್ಯಾ ಇರಾದ್ಯಾನ್ 1926 ಇಸ್ವೆಂತ್ ಪಯ್ಲ್ಯಾ  ಕ್ಲಾಸಿ ಥಾವ್ನ್ ಪಾಂಚ್ವಿ ಕ್ಲಾಸ್ ಪರ್ಯಾನ್ ಇಸ್ಕೊಲ್ ಆರಂಭ್ ಕೆಲೆಂ. ಭುರ್ಗ್ಯಾಂಕ್ ರಾವೊಂಕ್ ಏಕ್ ಆಸ್ರೊ ಆಸಾ ಕೆಲೊ. ಕಡಬಂತ್ 33 ವರ್ಸಾಂ ಲಾಂಬ್ ಆವ್ದೆಚೊ ಮಿಸಾಂವ್ ವಾವ್ರ್ ತಾಣಿಂ ಕೆಲೊ.

1957 ಥಾವ್ನ್ 1959 : ಮಾ.ಬಾ. ಬಾಜಿಲ್ ಸಾಲ್ವಾದೊರ್ ಡಿಸೋಜ. ಹಾಣಿಂ 1958 ಇಸ್ವೆಂತ್ ನವೆಂ ದೇವ್ ತೇಂಪ್ಲ್ ಬಾಂದ್ಲೆ. ಏಕಾ ಸಾದ್ಯಾ ಕಾಮೆಲ್ಯಾಬರಿ ಪಾಕ್ಯಾಕ್ ಚಡೊನ್ ತಾಣೆಂ ಕಾಮ್ ಕೆಲೆಂ. ಖಾಲ್ತ್ಯಾಂಕ್ ದೇವ್ ಊಂಚ್ ಉಬರ‍್ತಾ ಮ್ಹಳ್ಳ್ಯಾ ವಾಂಜೆಲಾಚ್ಯಾ ಉತ್ರಾ ಪರ್ಮಾಣೆಂ ಬಾಪ್ ಬಾಜಿಲ್ ಸೊಜಾಕ್ ಆಮ್ಚ್ಯಾ ದಿಯೆಸಿಜಿಚೊ ಗೊವ್ಳಿಬಾಪ್ ಜಾವ್ನ್ ದೆವಾನ್ ವಿಂಚ್ಲೊ. ಕಡಬ ಫಿರ್ಗಜ್‌ಗಾರಾಂಕ್ ಹ್ಯಾ ಪಾಸತ್ ಭಾರಿಚ್ ಅಭಿಮಾನ್ ಆಸಾ. 

1959 ಥಾವ್ನ್ 1961 : ಮಾ.ಬಾ. ಫ್ರೆಡ್ ಪಿ ಎಸ್ ಮೋನಿಸ್. ಹೊ ವಿಗಾರ್ ರೆತಿರ್ ದಿಂವ್ಚ್ಯಾoತ್  ಭೋವ್ ಶಾಣೊ ಆನಿ ನಾಂವಾಡ್ದಿಕ್ ಶಿಕವ್ಣ್ದಾರ್ ಮ್ಹಣ್ ನಾಂವಾಡ್ಲಲೊ ಜಾವ್ನಾಸಾ.

 1961 ಥಾವ್ನ್ 1969 : ಮಾ.ಬಾ. ಚಾರ್ಲ್ಸ್ ಡಿಸೋಜ. ವಿಗಾರ್ ಜಾವ್ನ್, ವಯ್ಜ್ ಜಾವ್ನ್ ಆಲ್ಯಾ ಪಾಲ್ಯಾಂಚಿ ವಕ್ತಾಂ ದೀವ್ನ್ ಪಿಡಾ ಗೂಣ್ ಕರ್ಚಿ ಶಾತಿ ತಾಕಾ ಆಸ್‌ಲ್ಲಿ.

1969 ಥಾವ್ನ್ 1978 : ಮಾ.ಬಾ. ಲೋರೆನ್ಸ್ ಗೋಮ್ಸ್. ಹಾಂಚಾ 9 ವರ್ಸಾಂಚಾ ಮಿಸಾಂವ್ ವಾವ್ರಾಂತ್ ಸವಿ ಕ್ಲಾಸಿ ಥಾವ್ನ್ ಸಾತ್ವಿ ಕ್ಲಾಸ್ ಪರ್ಯಾಂತ್ ಇಸ್ಕೊಲ್ ಆರಂಭ್ ಕೆಲೆಂ. ಸಾಂಗಾತಾಚ್ ಲ್ಹಾನ್ ಆಸ್‌ಲ್ಲೊ ಭುರ್ಗ್ಯಾಂಚೊ ಆಸ್ರೊ ಉದಾರ್ ಮನಾಂಚಾ ದಾನಿ ಮುಖಾಂತ್ರ್ ಸರ್ವ್ ಸವಲತ್ತ್ಯೊ  ಆಸ್‌ಲ್ಲೊ ಮಜ್ಭೂತ್ ಆಸ್ರೊ ಜಾವ್ನ್ ರೂಪಿತ್ ಕೆಲೊ. ಬೆಥನಿ ಮೆಳಾಚ್ಯಾ ಧರ್ಮ್ ಭಯ್ಣಿಂಕ್ ಹಾಂಗಾಸರ್ ಹಾಡವ್ನ್ ಫಿರ್ಗಜೆಂತ್ ಆಧ್ಯಾತ್ಮಿಕ್, ಗೊವ್ಳಿಕ್ ಆನಿ ಶೈಕ್ಷಣಿಕ್ ವಾವ್ರ್ ಕರುಂಕ್ ಆವ್ಕಾಸ್ ಕರ್ನ್ ದಿಲೊ. ಗಾದೆ ಕರ್ನ್, ಮಾಡ್ ಲಾವ್ನ್ ಕೃಷೆಕೀ ಮಹತ್ವ್ ದಿಲೊ. ಕಡಬ ಪರಿಸರಾಂತ್ಲ್ಯಾ ಸರ್ವ್ ಧರ್ಮಾಂಚ್ಯಾ ಲೊಕಾಕ್ ಕೂಲಿಗಾಗಿ ಕಾಳು ಮ್ಹಳ್ಳೆಂ ಸಿಒಡಿಪಿ ಚೆಂ ಯೋಜನ್ ಹಾಡ್ನ್ ಹಜಾರೊಂ ಲೊಕಾಚಾ ಪೊಟಾಚಿ ಬುಕ್ ತಾಣಿಂ ಥಾಂಬಯ್ಲಿ. ಫಿರ್ಗಜ್ ಲೊಕಾಚ್ಯಾ ಆತ್ಮಿಕ್ ಬರೆಂಪಣಾ ಪಾಸತ್ 3 ವಾಡೆ ರಚುನ್ ಜೆಜು, ಮರಿ ಆನಿ ಜುಜೆ ಮ್ಹಣ್ ಭಾಗೆವಂತ್ ಕುಟ್ಮಾಚಾ ಸಾಂದ್ಯಾoಚಿ ನಾಂವಾ ವಾಡ್ಯಾಕ್ ದೀವ್ನ್ ತಾಂಚಾ ಆತ್ಮಿಕ್ ವಾಡಾವಳಿಕ್ ಸಹಕಾರ್ ತಾಣಿಂ ದಿಲೊ. 

1978 ಥಾವ್ನ್ 1979 : ಮಾ.ಬಾ. ವಲೇರಿಯನ್ ಪಿಂಟೊ.

1979 ಥಾವ್ನ್ 1983 : ಮಾ.ಬಾ. ಕ್ಷೇವಿಯರ್ ಪಿಂಟೊ ಹಾಣಿ ಸೆವಾ ದಿಲಿ.

1983 ಥಾವ್ನ್ 1988 : ಮಾ.ಬಾ. ರೋಕಿ ಡಿಸೋಜ. ಹಾಣಿಂ ಫಿರ್ಗಜೆಚ್ಯಾ ಆದಾಯಾ ಖಾತಿರ್ ರಬ್ಬರ್ ಕೃಷಿ ಕೆಲಿ. ಲೊಕಾಚ್ಯಾ ಆರ್ಥಿಕ್ ಉದರ್ಗತೆ ಖಾತಿರ್ ಗೊರ್ವಾಂ ಪೊಸುನ್ ಕಡಬಂತ್ ದುದಾಚಿ ಡೈರಿ ಸ್ಥಾಪನ್ ಕರ್ನ್ ಸ್ಥಾಪಕ್ ಅಧ್ಯಕ್ಷ್ ಜಾಲ್ಲಿ ಶಾಬಾಸ್ಕಿ ತಾಂಕಾ ಫಾವೊ ಜಾತಾ. ಕಡಬಂತ್ ಸಂಯುಕ್ತ ಕ್ರಿಸ್ಮಸ್ ಆಚರಣ್ ಕರುಂಕ್ ಕಾರಣ್‌ಕರ್ತ್ ಜಾಲ್ಲೊ ವಿಗಾರ್ ಆನಿ ಫಿರ್ಗಜೆಂತ್ ಐಸಿವೈಎಂ ಸ್ಥಾಪನ್ ಕರ್ನ್ ಯುವಜಣಾಂಕ್ ಎಕ್ವಟಾಕ್ ಹಾಡ್‌ಲ್ಲಿ ಶಾತಿ ತಾಂಚಿ ಜಾವ್ನಾಸ.

1988 ಥಾವ್ನ್ 1994 : ಮಾ.ಬಾ. ಜೆರಾಲ್ಡ್ ಡಿಸೋಜ. ಹಾಣಿಂ ಮಾಡಿ ಲಾವ್ನ್ ಕೃಷಿ ಅಭಿವೃದ್ಧಿ ಕೆಲಿ. ಇಸ್ಕೊಲಾಚ್ಯಾ ಬಾಂದ್ಪಾಚೆ ನವೀಕರಣ್ ಕೆಲೆಂ.

1994 ಥಾವ್ನ್ 2001 : ಮಾ.ಬಾ. ಸ್ಟೇನಿ ರೊಡ್ರಿಗಸ್. ಹಾಣಿಂ ಲ್ಹಾನ್ ಕ್ರೀಸ್ತಾಂವ್ ಸಮುದಾಯ್ ಪ್ರಾರಂಬ್ ಕೆಲೊ.

2001-2014 : ಮಾ.ಬಾ. ಅಲೆಕ್ಸಾಂಡರ್ ಲುವಿಸ್. ಹ್ಯಾ ವಿಗಾರಾನ್ ಕಡಬ ಫಿರ್ಗಜೆಚೆ ಸಗ್ಳೆಂ ರೂಪ್ ಬದ್ಲಿಲೆಂ ಮ್ಹಣ್ಚ್ಯಾಕ್ ಕಾಂಯ್ ದುಬಾವ್ ನಾಂ. ತಾಂಚಾ 13 ವರ್ಸಾಂಚಾ ಮಿಸಾಂವ್ ವಾವ್ರಾಂತ್ ಆಧುನಿಕ್ ರಿತಿಚಿ ಕೃಷಿ ಉರ‍್ಚೆ ಖಾತಿರ್ ಬೋರ್‌ವೆಲ್ ಕಾಡವ್ನ್ ಉದ್ಕಾಚಿ ವ್ಯವಸ್ಥಾ ಕೆಲಿ. ಸಾಂ. ಜೋಕಿಮಾಕ್ ಸಮರ್ಪಿಲ್ಲೆಂ ಆಟ್ವೆ ಥಾವ್ನ್ ಧಾವಿ ಮ್ಹಣಾಸರ್ ಕನ್ನಡ ಮೀಡಿಯಂ ಹೈಸ್ಕೂಲ್ ಆನಿ ಪದವಿಪೂರ್ವ್ ಕಾಲೆಜ್, ತಶೆಂಚ್, ಸಾಂತ್ ಅನ್ನಾಕ್ ಸಮರ್ಪಿಲ್ಲೆಂ ಪೂರ್ವ್ ಪ್ರಾಥಮಿಕ್ ಥಾವ್ನ್ 10ವ್ಯಾ ಕ್ಲಾಸಿ ಪರ್ಯಾಂತ್ ಇಂಗ್ಲೀಷ್ ಮೀಡಿಯಂ ಇಸ್ಕೊಲ್ ಆರಂಭ್ ಕೆಲೆಂ ಆನಿ ದೋನಿ ಇಸ್ಕೊಲಾಂಕ್ ಸರ್ವ್ ಸವ್ಲತಾಯೆನ್ ರ‍್ಲೆಲಿ ಬಾಂದ್ಪಾ ಉಬರ‍್ಲಿ. ನವ್ಯಾ ಇಗರ್ಜೆಚೆ ಬಾಂದಾಪ್, ವಿಗಾರಾಕ್ ನವೆಂ ವಸ್ತೆ ಘರ್ ಬಾಂದಯ್ಲೆ.  ಫಿರ್ಗಜೆಕ್ ಆದಾಯ್ ಜಾಯ್ಜೆ ಮ್ಹಳ್ಳ್ಯಾ ಖಾತಿರ್ ವಾಣಿಜ್ಯ್ ಸಂಕೀರ್ಣಾಚೆ ಕಾಮ್ ಸುರು ಕೆಲೆಂ. ಫಕತ್ ಪಾತ್ರಾಂಚಿ ಬಾಂದ್ಪಾ ಮಾತ್ರ್ ಬಾಂದ್‌ಲ್ಲಿ ನ್ಹಂಯ್ ಆಸ್ತಾ, ಫಿರ್ಗಜೆಚ್ಯಾ ಲೊಕಾಚಿ ಕಾಳ್ಜಾಂಯಿ ದೆವಾಚ್ಯಾ ಮೊಗಾಂತ್ ಬಾಂದುನ್ ಕ್ರೀಸ್ತಾಂವ್ ತಶೆಂ ಅಕ್ರಿಸ್ತಾಂವ್ ಲೊಕಾಕ್ ಕ್ರೀಸ್ತಾಚೆ ಮಿಸಾಂವ್ ತಾಣಿಂ ಪರ್ಗಟ್ ಕೆಲೆಂ.

2014 ಥಾವ್ನ್ 15 : ಮಾ.ಬಾ. ಎಡ್ವಿನ್ ಪಿಂಟೊ. ಹಾಣಿಂ ಇಗರ್ಜೆಕ್ ನವೆಂ ಮೈಕ್ ಸೆಟ್ ಹಾಡಯ್ಲೆಂ.

2015 ಥಾವ್ನ್ 16 : ಮಾ.ಬಾ. ಮೈಕಲ್ ಲೋಬೊ. ಹಾಣಿಂ ವಾಣಿಜ್ಯ್ ಸಂಕೀರ್ಣಾಚೆ ಕಾಮ್ ಮುಕರ‍್ಸುನ್ ವೆಲೆಂ. ಸಮುದಾಯ್ ಭವನ್ ಬಾಂದುಕ್ ಗರ್ಜ್ ಆಸ್ಚಿ ಕಾಮಾಂ ಕೆಲಿಂ. 

2016 ಥಾವ್ನ್ 17 : ಮಾ.ಬಾ. ಪಾವ್ಲ್ ಕ್ರಾಸ್ತಾ. ಹಾಣಿಂ ನವ್ಯಾ ಸಿಮಿಸ್ತಿoಚೆಂ ಕಾಮ್ ಹಾತಿಂ ಘೆವ್ನ್ ತೆಂ ಪೊಂತಾಕ್ ಪಾವಯ್ಲೆಂ.

2017 ಥಾವ್ನ್ 2021 : ಮಾ.ಬಾ. ರೊನಾಲ್ಡ್ ಲೋಬೊ. ಹಾಣಿಂ ವಾಣಿಜ್ಯ್ ಸಂಕೀರ್ಣಾಚೆ ಕಾಮ್ ಸಂಪಯ್ಲೆ ಆನಿ ಉಗ್ತಾವಣ್ ಕೆಲೆಂ. 

2021 ಥಾವ್ನ್ 23 : ಮಾ.ಬಾ. ಅರುಣ್ ವಿಲ್ಸನ್ ಲೋಬೊ. ಹಾಣಿಂ ಇಗರ್ಜೆಕ್ ಬಾಂಕ್, ಇಸ್ಕೊಲಾಕ್ ಪಾಕೆಂ, ಎಲ್‌ಸಿಡಿ ಪ್ರೊಜೆಕ್ಟರ್ ಹಾಡಯ್ಲೆಂ.

ಅಶೆo 16 ಜಣಾಂ ವಿಗಾರಾನಿ ತಾಂಕಾ ತಾಂಕಾ ಲಾಭ್‌ಲ್ಲ್ಯಾ ಆವ್ದೆಂತ್ ಫಿರ್ಗಜ್ ಲೊಕಾಚ್ಯಾ ಆತ್ಮಿಕ್ ತಶೆಂಚ್ ಸಾಮಾಜಿಕ್ ಅಭಿವೃದ್ಧೆ ಖಾತಿರ್ ಖಳ್ಮಿತ್ ನಾಸ್ತಾನಾ ವಾವುರ್ನ್ ಹ್ಯಾ ಫಿರ್ಗಜೆಂತ್ ತಾಂಕಾ ಪಾಟಿಂಬೊ ದಿಲ್ಲ್ಯಾ ಉಪಾಧ್ಯಕ್ಷ್, ಕಾರ್ಯದರ್ಶಿ, ಗುರ್ಕಾರ್ ಆನಿ ಭಾವಾಡ್ತಿ ಲೊಕಾಚ್ಯಾ ಸಹಕಾರಾನ್ ಭಾವಾಡ್ತ್ ಜಿವಾಳ್ ದವರ್ಲಾ ಆನಿ ಕ್ರೀಸ್ತಾಚೆ ಮಿಸಾಂವ್ ಉತ್ತೀಮ್ ರಿತಿನ್ ಹಾಂಗಾಸರ್ ಪರ್ಗಟ್ ಜಾಲಾ. ಪ್ರಸ್ತುತ್ ಆಮ್ಚ್ಯಾ ಫಿರ್ಗಜೆಂತ್ ಮಾ.ಬಾ. ಪ್ರಕಾಶ್ ಪಾವ್ಲ್ ಡಿಸೋಜ ಸತ್ರಾವೊ ವಿಗಾರ್ ಜಾವ್ನ್ 2023 ಇಸ್ವೆಚ್ಯಾ ಮೇ ಮಹಿನ್ಯಾ ಥಾವ್ನ್ ಫಿರ್ಗಜೆಚೆ ಸುಂಕಾಣ್ ಹಾತಿಂ ಘೆವ್ನ್ ಲೊಕಾ ಸಾಂಗಾತಾ ಆಪ್ಲೊ ಮಿಸಾಂವ್ ವಾವ್ರ್ ದೀವ್ನ್ ಆಸಾತ್.ಫಿರ್ಗಜೆಂತ್ 48 ಕೊಂಕ್ಣಿ ಕ್ರೀಸ್ತಾಂವ್ ಕುಟ್ಮಾಂ ಆನಿ ಸಾತ್ ತಮಿಳ್ ಕ್ರೀಸ್ತಾಂವ್ ಕುಟ್ಮಾಂ ಸೊವಿಸ್ ಕಿ.ಮೀ. ವ್ಯಾಪ್ತಿಂತ್ ವಸ್ತಿ ಕರುನ್ ಆಸಾತ್.ಫಿರ್ಗಜೆಂತ್ ತೀನ್ ವಾಡೆ ಆಸಾತ್. ಏಕಾ ವಾಡ್ಯಾಂತ್ ಸ್ರ‍್ತೀ ಗುಕಾರ‍್ನ್ ಜಾವ್ನ್, ದೋನ್ ವಾಡ್ಯಾನಿ ದಾದ್ಲೆ ಗುರ್ಕಾರ್ ಜಾವ್ನ್ ವಾಡ್ಯಾಂತ್ ತಶೆಂ ಫಿರ್ಗಜೆಂತ್ ಬರೊ ವಾವ್ರ್ ದೀವ್ನ್ ಆಸಾತ್.

ಐಸಿವೈಎಂ, ಕಥೋಲಿಕ್ ಸಭಾ, ಸ್ರ‍್ತೀ ಸಂಘಟನ್, ಆಲ್ತಾರ್ ಭುರ್ಗ್ಯಾಂಚಿ ಆನಿ ಮರ್ಯೆಚಿ ಸೊಡಲೆಟಿ ಮ್ಹಳ್ಳೆ ಸಂಘ್ ಸಂಸ್ಥೆ ಹಾಂಗಾಸರ್ ಆಪ್ಲಿ ಸೆವಾ ದೀವ್ನ್ ಆಸಾತ್.ಬೆಥನಿ ಮೆಳಾಚಿಂ ಧರ್ಮ್ ಭಯ್ಣಿಂ ಶಿಕ್ಷಣ್ ಕ್ಷೇತ್ರಾಂತ್ ವಾವ್ರ್ ಕರ್ತಾತ್ ಆನಿ ಜೆಎಂಜೆ ಕೊವೆಂತಾಚಿ ಧರ್ಮ್ಭಯ್ಣಿಂ ಭಲಾಯ್ಕೆ ಶೆತಾಂತ್ ವಾವ್ರ್ ಕರ್ತಾತ್. ತಶೆಂಚ್ ಇಗರ್ಜ್ ಸೊಭೊಂವ್ಚ್ಯಾoತ್ ಆನಿ ಕ್ರೀಸ್ತೀ ಶಿಕ್ಷಣ್ ದಿಂವ್ಚ್ಯಾ ವಾವ್ರಾಂತ್ ದೊನಿ ಕೊವೆಂತಾಚಿ ಧರ್ಮಭಯ್ಣಿ ಸಹಕಾರ್ ದಿತಾತ್. 

ಫಿರ್ಗಜೆಂತ್ ಚಡ್ತಾವ್ ಕುಟ್ಮಾಂ ಕೃಷಿಕ್ ಆನಿ ಮಧ್ಯಮ್ ವರ್ಗಾಚಿ ಜಾವ್ನಾಸೊನ್, ಕುಟ್ಮಾಚಿ ಆರ್ಥಿಕ್ ಸ್ಥಿತಿ ಮಧ್ಯಮ್ ಆಸ್ಲ್ಯಾರೀ  ಆತ್ಮಿಕ್ ರಿತಿನ್ ಸಕ್ಕಡ್ ಕುಟ್ಮಾಂ ಗ್ರೇಸ್ತ್ ಜಾವ್ನಾಸಾತ್. ಹರ್ಯೆಕಾ ಕುಟ್ಮಾಂತ್ ಮಾಗ್ಣೆಂ, ಭಕ್ತಿಪಣ್, ದೆವಾಸಾಂವ್ ಆಸಾ ಆನಿ ಭಾವಾರ್ಥ್ ಜಿವಾಳ್ ತಶೆಂಚ್ ಘಟ್ ಆಸಾ ಮ್ಹಣ್ಚ್ಯಾಕ್ ದಾಕ್ಲೊ ಜಾವ್ನ್, ಆಮ್ಚ್ಯಾ ಫಿರ್ಗಜೆ ಥಾವ್ನ್ ಸಾತ್ ಜಣ್ ಯಾಜಕ್ ಆನಿ ಪಾಂಚ್ ಜಣಾಂ ಧರ್ಮ್ ಭಯ್ಣಿಂ ಜಾವ್ನ್ ಭಾರತಾಚ್ಯಾ ದುಸ್ರ‍್ಯಾ ದುಸ್ರ‍್ಯಾ ದಿಯೆಸಿಜಿನಿಂ ಆಪ್ಲೊ ಮಿಸಾಂವ್ ವಾವ್ರ್ ದೀವ್ನ್ ಆಸಾತ್. ತಿತ್ಲೆಂಚ್ ನ್ಹಂಯ್ ಆಜ್ ಆಮ್ಚೆ ಮಧೆಂ ಆಸ್ಚೊ ಬೆಳ್ತಂಗಡಿ ದಿಯೆಸಿಜಿಚೊ ಬಿಸ್ಪ್ ಅ.ಮಾ.ದೊ. ಲೋರೆನ್ಸ್ ಮುಕ್ಕುಝಿ, ಹ್ಯಾಚ್ ಕಡಬಾಂತ್ ಜಲ್ಮೊನ್, ಆಮ್ಚ್ಯಾ ಫಿರ್ಗಜೆಚ್ಯಾ ಪಯ್ಲೊo ವಿಗಾರ್ ಮಾ.ಪಾ. ಲೋರೆನ್ಸ್ ಲೋಬೊ ಥಾವ್ನ್ ತಾಣಿಂ ಪವಿತ್ರ್ ಸ್ನಾನ್ ಘೆತ್‌ಲ್ಲೊ ಮ್ಹಣ್ ಸಾಂಗೊoಕ್ ಆಮಿ ಅಭಿಮಾನ್ ಆನಿ ಸಂತೊಸ್ ಪಾವ್ತಾಂ.

ಶೆoಭರ್ ವರ್ಸಾ ಆದಿಂ ಕಡಬ ಫಿರ್ಗಜೆಂತ್ ಸುರ್ವಿಲ್ಯಾ ವಿಗಾರಾನ್ ಪೆಟಯ್ಲಲೊ ಭಾವಾರ್ಥಾಚೊ ದಿವೊ ತ್ಯಾಚ್ ಪ್ರಕಾರ್ ಉಪ್ರಾಂತ್ ಆಯಿಲ್ಲ್ಯಾ ಸರ್ವ್ ವಿಗಾರಾನಿಂ ಜಾಯ್ ಪುರ್ತೆಂ ತೇಲ್ ವೊತುನ್ ಹೊ ದಿವೊ ಜಳ್ತೊ ಸಾಂಬಾಳ್ಳಾ ಆನಿ ಉಜ್ವಾಡ್ ದಿಂವ್ಕ್ ಕಾರಣ್ ಜಾಲಾ. ಹ್ಯಾ ಬಾವಾರ್ಥಾಚಾ ದಿವ್ಯಾಂತ್ಲೆ ತೇಲ್ ಕೆದಿಂಚ್  ಉಣೆಂ ಜಾಯ್ನಾಶೆಂ ಜಳ್ತೊ ಸಾಂಬಾಳುoಕ್ ಆನಿ ಸರ್ವಾಂಕ್ ದಿಸ್ಚೆ ಬರಿ ದಿವ್ಟೊಣೆರ್ ದವ್ರುಂಕ್ ಆನಿ ಉಜ್ವಾಡ್ ಫಾಂಕೊವ್ಕ್ ದೇವ್ ಆಮಾ ಸರ್ವಾಂಕ್ ಫಾವೊ ಕರುಂದಿ ಮ್ಹಣ್ ಆಶೆತಾಂವ್ ಆನಿ ಮಾಗ್ತಾಂವ್. 

ದೇವ್ ಬರೆಂ ಕರುಂ

ಜಾಗೊ : ಕಡಬ       ವಿಗಾರ್, ಉಪಾಧ್ಯಕ್ಷ್, ಕಾರ್ಯದರ್ಶಿ

ತಾರೀಕ್ : 26-07-2024                ಫಿರ್ಗಜ್ ಗೊವ್ಳಿಕ್ ಪರಿಶದ್, ಆನಿ ದೇವ್ ಪ್ರಜಾ

                                        ಸಾಂ. ಜೋಕಿ ಫಿರ್ಗಜ್, ಕಡಬ